笔趣吧

手机浏览器扫描二维码访问

第十七回十三旦应聘返京师胡宝玉束装游广省（第3页）

耳边忽听得有人叫唤，睁开眼来，见是阿金立在面前，还只道是做梦，糊里糊涂的问道：“快是真格阿金介？”

阿金笑道：“我勿见得是冒充格，是我转来哉呀！

快点醒醒罢，困勒榻浪要受寒格哩。”

宝玉听说，忙把眼睛揩了一揩，方始清醒，坐起身来，也笑道：“奴真真困昏勒里哉，还当是刚刚做梦来呀，阿要笑煞！

啥弄到故歇辰光勒转介？害得奴等煞快，心焦得呒淘成。

到底阿曾打听着嗄？”

阿金道：“我今朝忙仔一日天，证我且得坐一坐，定一定神，吃格一碗茶，难末细细能格告诉拨勒听。

呒不啥实梗要紧格！”

宝玉道：“急惊风碰着格慢郎中，求卖啥关子哉，奴事后终重重谢阿好？”

阿金道：“格末听仔：我早晨起来，八点钟就出去，吃仔点点心，马上到各处去打听，才回头我勿晓得。

我奔到仔吃饭辰光，碰着仔一个巷浪阿姊，拉我到俚屋里去，吃仔一顿饭。

再到认得格案目搭去，落里晓得勿勒浪。

我本想要转来，又恐怕说我勿道地，一时弄得我呒哪哼。

忽然想着仔月山格搭……”

阿金讲到其间，宝玉抢着说道：“月山搭是去勿得格！

到底去呢去介？”

阿金道：“着急，听我说下去。

我一走走到月山搭，细细一想，勿好当面去问俚，只好问俚笃格用人，谅来有点因头格。

难末我走过去碰门。

里向开出来，我认得是月山用人，我就假做式问俚：‘唔笃主人阿勒屋里？’俚说道：‘今朝是礼拜，上台去做日戏哉。

’我便问俚：‘十三旦住勒啥场化？’俚就指指格边，说：‘也住勒间条弄里，隔得四家人家。

’我细细教认清爽仔，要想走哉，俚倒拉牢仔问我，说：‘来看倪主人，阿有啥事体佬？’我只好瞎说两声（读生），说：‘我现在勿登勒胡家（读夹）里哉。

我故歇从城里出来，路过间搭，格落望望唔笃主人家呀！

既经勿勒屋里，我也勿进去哉，搭改日会罢。

’我就此脱身转来，走到半路浪，吃力得呒淘成，亦碰着仔一个亲眷，拖我去吃茶，我借此歇仔一歇，所以转得晏仔点哉。”

宝玉道：“勿拨月山晓得，总算还好。

倒是一样勿凑巧，夹忙头里，明朝夜里有客人摆酒，只好后日去请俚格哉。”

阿金道：“请末明朝去请，约末约俚后日阿好？”

宝玉道：“蛮好蛮好。

诸事才托末哉。”

当夜别无书说。

到明日午餐时，宝玉起身，阿金已去请过，归来回覆说：“十三旦见仔格帖子，一口应承，准定明晚十一点钟赴约，决不放生格。”

宝玉满心欢喜，撇去愁烦。

当日应酬马姓客人，开筵侑酒，却不是书中的关节，不须细叙。

单说下一天，宝玉浓妆艳抹，打扮时新，等候十三旦到来，畅叙欢情。

惟日间尚是闷闷，只恨初夏昼长，太阳不肯下去，月亮不肯上来，仿佛度日如年。

好容易挨至晚上。